मीनभवनस्थित निजामती अस्पतालमा सेवा लिन सात घण्टासम्म लाइन लाग्नुपरेको विरह लाग्दो अवस्था रहेको गुनासो विरामीहरुले गर्न थालेका छन् । नेपाल सरकार मुख्य सचिव गोविन्द बहादुर कार्की अध्यक्ष र भूमि व्यवस्था सहकारी संघीय मामिला तथा सामान्य प्रशासन सचिव मदन भुजेल,अर्थ सचिव घनश्याम उपाध्याय,कानुन सचिव पराश्वर ढुंगना,स्वस्थ्य सचिव विकास देवकोटासहित सरकारका पाँच सचिव सञ्चालक रहेको सो अस्पतालमा विरामीहरुले सेवा लिन झण्डै सात घण्टा लाइन लाग्नुपर्ने अवस्था रहेको गुनासो बढ्न थालेको छ ।

बिज्ञापन

दैनिक १२ सयदेखि १५ सय जना बिरामी उपचारका लागि सिभिल अस्पतालमा पुग्दै आएकोमा प्रशासनको भद्रगोल व्यवस्थापनका कारण झण्डै सात घण्टासम्म लाइन लाग्नु पर्ने अवस्था रहेको चर्काे आलोचना शुरु भएको हो । अस्पताल प्रशासनका अनुसार,ओपीडी काउन्टर बिहान ७ बजे खुल्छ तर चिकित्सकहरू साढे ९ बजेदेखि बिरामी हेर्न सुरु गर्छन् । तर, टिकट पाउने आशमा बिरामीहरू बिहान ४–५ बजेदेखि नै लाइनमा बसिरहेको भेटिन्छन्,त्यहाँ । उसो त अनलाइनबाटै टिकट काट्न पाइने व्यवस्था पनि नभएको होइन तर ३५ जनाका लागि मात्र कोटा सीमित छ । त्यसमा पनि निजामती कर्मचारी र सर्वसाधरणका कोटा छुट्टाइएको हो । स्थायी र करार गरी १६३ जना चिकित्सकहरु कार्यरत रहे पनि अस्पताल प्रशासनको व्यवस्थापकीय कमजोरीका कारण उपचारका खोजीमा सिभिलमा पुगेका विरामीहरुको बेहाल हुँदै आएको छ ।